კვონ კიოკი (권기옥) დაიბადა 1901 წლის 11 იანვარს, ფხენიანის მახლობლად მდებარე სოფელში, დიდგვაროვნების ოჯახში. იგი გახდა პირველი კორეელი მფრინავი ქალი. 17 წლის ასაკში იგი დაესწრო ამერიკელი პილოტის არტ სმიტის სპექტაკლს, რამაც შთააგონა იგი ამ გზის არჩევაში.

სკოლაში კვონ კიოკზე დიდი გავლენა მოახდინა მასწავლებელმა პარკ ჰიუნ სუკმა. პარკ ჰიუნსუკი იყო საიდუმლო ანტი-იაპონური საზოგადოების სუნგჯუკის (송죽회) წევრი. სუნგჯუკი იყო ქალთა დამოუკიდებლობის მოძრაობა და ძირითადად შედგებოდა სკოლის მასწავლებლებისა და სტუდენტებისგან. მათი მიზანი იყო კორეის დამოუკიდებლობის არმიისთვის ფინანსური დახმარება, გადასახლებული გუბერნატორების ოჯახების დახმარება და იაპონიისგან დამოუკიდებლობისთვის ბრძოლა. ასე რომ, როდესაც 1 მარტის მოძრაობა დაარსდა, თვრამეტი წლის კვონ კიოკმა აქტიური მონაწილეობა მიიღო მასში, მაგრამ სამი კვირით დააპატიმრეს, რასაც შეიძლება წარმატებაც კი ვუწოდოთ, რადგან დემონსტრაციის დარბევისას ათასზე მეტი ადამიანი დაიღუპა და კიდევ უფრო მეტი დაშავდა.

ამის შემდეგ კვონ კიოკმა შეაგროვა შემოწირულობები კორეის რესპუბლიკის დროებითი მთავრობის სამხედრო საჭიროებებისთვის, მაგრამ კვლავ ციხეში აღმოჩნდა, ამჯერად ექვსი თვით. მან კიდევ ერთხელ გააგრძელა თავისი საქმიანობა. მან დამოუკიდებლობისთვის მებრძოლებს სკოლის ნახშირის საწყობი გადასცა თავშესაფრად. ასევე, სხვადასხვა რეგიონში მიმოფანტულ თანამოაზრეებთან შეხების მიზნით, მან შექმნა ახალგაზრდული ქალთა ორგანიზაცია და ამ საფარქვეშ ლექციებითა და გამოსვლებით მოიარა მთელი ქვეყანა, პარალელურად ახორციელებდა საიდუმლო ოპერაციებს.

საბოლოოდ, იაპონიის პოლიციამ გამოავლინა, რომ ამ ყველაფერში ჩართული იყო კვონ კიოკი. მამაცი გოგონა არ დალოდებია, სანამ ტყვედ აიყვანდნენ და ნავით გაიქცა შანხაიში. ამ ყველაფრის შემდეგ, რაც მან გადაიტანა, მისი ოცნება გამხდარიყო მფრინავი მხოლოდ გაძლიერდა. ჩინეთში იგი შევიდა სკოლაში ჩინური და ინგლისური ენის შესასწავლად. სკოლის დამთავრების შემდეგ იგი შევიდა არმიის საავიაციო სკოლაში, რაც არც ისე ადვილი იყო. სადღაც უარი უთხრეს, რადგან იგი ქალი იყო. მაგრამ კვონ კიოკი არ დანებდა. იგი  მაინც ჩაირიცხა და ისეთი ბრწყინვალე უნარი აჩვენა, რომ მხოლოდ 9 საათის ვარჯიშის შემდეგ მარტო ფრენის ნება დართეს. იმავე პერიოდში იაპონიის საკონსულომ გაგზავნა მკვლელი კვონ კიოკის მოსაშორებლად. ამიტომ გოგონამ სკოლიდან გასვლა ვერ შეძლო და იძულებული გახდა დილით ადრე ევარჯიშა გამოცდისთვის.

რა თქმა უნდა, ნიჭიერმა სტუდენტმა გამოცდა წარმატებით ჩააბარა. ასე რომ, კვონ კიოკი გახდა პირველი კორეელი მფრინავი ქალი. თუმცა, იმ დროს კორეას არ ჰყავდა საკუთარი საჰაერო ძალები, ამიტომ კვონ კიოკი გახდა ჩინეთის არმიის პილოტი. ორ წელიწადში მან დააგროვა დაახლოებით 7000 ფრენის საათი.

1932 წელს, შანხაის პირველი ბრძოლის დროს, კვონ კიოკმა თვითმფრინავიდან ესროლა იაპონელებს, რისთვისაც დაჯილდოვდა. აღსანიშნავია, რომ პილოტმა ცხოვრებაში უამრავი ორდენი და მედალი მიიღო. 1937 წელს მსახურობდა ინსტრუქტორად, ასწავლიდა იაპონურსა და ინგლისურს და უსმენდა იაპონურ რადიოს. მიღებული ინფორმაცია მან სამხედროებს გადასცა. 1943 წელს კვონ კიოკმა მონაწილეობა მიიღო კორეის პატრიოტ ქალთა ასოციაციის ხელახლა დაარსებაში, რაც დაეხმარა დამოუკიდებლობის მოძრაობის გაფანტული აქტივისტების გაერთიანებას. ომის დასასრულს იგი იყო კორეის დამოუკიდებლობის არმიის პოლკოვნიკი.

1975 წელს მან მთელი თავისი ქონება სტიპენდიისთვის გადასცა სტუდენტებს, რომლებსაც ოჯახური მიზეზების გამო მოუწიათ სწავლის დატოვება. კვონ კიოკი ცხოვრობდა თავისი ქვეყნის გულისთვის და აგრძელებდა დაუღალავად მუშაობას კორეის საზოგადოების სასარგებლოდ 1988 წლამდე. 1998 წელს იგი გარდაიცვალა.